Sukulu Basaa i Fontenay-sous-Bois

Sukulu Basaa i bi yiblana i nwii 2001. I nleege bôt bobasôna i ba bé ndotla yokikii yo, inyu i nigil i Pot, i Tila ni i Añ.
I Nwii 2003, nyen kaat YIGIL BASAA i bisu i niiga hop u Basaa i bi pam ni mahôla ma tison i Fontenay-Sous-Bois. Di ga waa bé ti i tison ini mayéga, ndi to i hôya likébla jab lini kelkikel inyu i ti ngui inyu i hôlôh mam ma loñ yap ni ma ma bon ba loñ ma ba mambog mape.
Ha ndig mahôla ma nkuh, bé motama, Tison i Fontenay-sous-bois bi ti bés mandap ma sukulu ni ndegi yap. Mu mandap nyen di nleegene baudu ba gwé ngôñ i nigil Hop u Basaa.

Inyu bikaat bi bi toñol biniigana bi Hop Basaa, bi yé i béña

Ngéda di mbénge isongi u baudu ba sukulu, ibôdôl bibéé gwé, di ntehe le isongi wap u mbed ndig bed ni bed hikikii nwii.
Sukulu ini, i gwé balét ba ba nyi nson u niiga, Ba bi kwo ki nkaa le Mahop ma biloñ bi Afrika ma nlama tilba ni niigana.
Sukulu ini i gwé minjep mi gwigil bipe : Kikii bo yigil i masak ma Loñ Basaa, yigil i mintén mitjémbi ma Mbog yés.
Sukulu FEDABA ini, i ki ngéda minkwel mi Miñañ Mbog Afrika, mimi ñéba kii Afrika i bi lona, ni kii i nlona len ini ikété Mambog ma nkoñ isi : Ibôdôl ngéda Bifarô i Égiptô ike ipam dilo tini

Mbaga i nla ba le: Inyu kii Sukulu i Basaa?

Ndimbhe i mbadga ini, i yéne ndigi buk yada : Mbok Basaa. Mbok ini yon i mboñ le Nsaa, a mpôna bé mut litén lipe i Libag ni litehge li Mbok.

Inyu Libag li Nsaa, « Kulkéé, a nwo bé nyu ni kanda yé » Hala ni nyen Nsaa a nlama tééda Libag li Mnbok yé ni i jé nyemede. Ngi wo nyu, ngi bihéñba gwo kikii gwo.

Hop Basaa, kikii mahop mape, w’a la bé niñ ibale u mpôda bé, ibale u gwé bé longe ndoñi ni bisélél bi bi nhôla le bôt bape ban la nigil ni i gwélél wo.

Hop u yé kikii binumba bi bi nti ntode njiñ inyu mut niu Mbok yé. Hop u yom i bisu i i ñat bôt ba ba mpot nlélém hop. Hop u yé su u ngim Mbog.

Inyu hala ni nyen yag bés di noode heñ i lona ndég ngui ni mahôla le Hop u Loñ Basaa u wo bañ, ndi u niñ.

Nson unu u yé nseñ inyu bon ba ba gwééne i biloñ bipe, ndi bebek yag inyu bagwal ba bi bana bé ngôô i pôdôh bon bap hop wap, ba hôya le hop u ntek libag li mut binam. U nhôla ki mut a neebe ni singe libag jé.

Sukulu Hop Basaa, i yé inyu bôt bobasôna

FEDABA a gwé makenge ma yigil Hop Basaa imaa. Jada li yé inyu bonge batitigi (Ntôñ Diséé), lipe inyu njohog ni mañ mibôt.

Inyu bonge batitigi, di ngwélél likenge li mintuk. Inyu mañ mi bôt, di ngwélél likenge li yigil ni mam ba mbéna boñ, mam mbéna pot ni mahop mape ikété niñ wap i hikikii kel. I boñ le nôgda nseñ u yigil yap ikété biniñ gwap.

Hikuu hi FEDABA hion hi yé ño u Sukulu ni nkena FEDABA nu a yé nkot hikuu ni baudu. Libim li bôt ba hikuu ba yé ki balét, hi kikii wada ni nwé njep.

FEDABA a gwé ngôñ ni mbôñ i bôt, le hi kiki wada wap, a lona yi i hôlôh nson u Hop u Basaa unu.

Sukulu FEDABA ini, i nsal ni minlôñ mimpe, ni bisukulu bi bi niiga mam inyu Afrika ni minlôñ mi bon ba Afrika mi mi yé hana i Pulasi.

FEDABA a yon ngaba ikété mahol ma milôñ mi mi niiga Libag li Afrika, inyule “I yom i ba i ndap kôp, yon i ban dap lolo.”

Makak Ma Nwii Sukulu / Mangéda makeñi ma niñ i FEDABA

Kikii mut binam, FEDABA a gwé mangéda ma bi tina nye, i yoñ ngaba i ngand i Minlôñ mi Tison i Fontenay-Sous-Bois.
Ngand Madelon
Ngand Milôñ

Minlôñ nwomisôna mi Tison Fontenay-Sous-Bois. Mu nyen hikikii loñ ni nlôñ wé, ba ñéba libag li loñ yap : bijek gwap – haba wap – masak map ni hikikii yom i i yé yibne i loñ. Di gwé pele yés hikikii nwii. Ki di gwé ki ngand ipe bimélél bi nwii u sukulu

Ngand Minlôñ : I yé hi kii nwii  i bibôdlene bi  sôñ dipôs. Mbaï i ti bés pele inyu éba minson nwés (Sukulu, Masak, minlamb…)

Ngand lisuk li nwii li Sukulu

Ngand Isik
Bibuk bini, bi kobol jôl li ngand ini longe. A yé ngéda di mbénge nson di nsal inyu ngim nwii u sukulu. Ngand ini, i nhôla bés i kogol biniigana gwés, i léméh gwo inyu nwii u sukulu mondo.

A yé ki ngéda i di yé di bana nkwel ni mbombog. Di nigil jôga libigwélél, bipôdôl ni mama mape.

Mbus, kikii lem i Mbok yés, di yé disôk di jéla ni yôla.

Ngéda u niñil i mbog bôt bape, u nlama noñ bilem bihogi, bitelne bi makidig map. Kikii ngand Isik i bi andal ni nkoñ isi wosô, di nla bé bagba, tole i yén ipañ njel, di nunug kikii bôt bape ba bédéh ni éba tjémbi, ni mintén nwap mi masak nwomisôna. FRDABA, a nyoñ ngaba munu i ngand i Tison i bi leege bés.

Di yé nlôñ u Basaa, adna i matéñ ma babimbi, di bi kotba inyu i hôlôs wés,inyu i pot wo, inyu i niiga wo ni i gwélél matiñ ma mbog yés

Litén ni litén li li ga bana nlélém ngôô kii bés inyu i hôlôs hop wéé, liga koba nwemel wés u néhi. Hala a ga ngwéñbaha ni hôlôs nson u hop Basaa